Marhainska
W. Sakoetoe
Ortopedagogo, eskritor i organisadó
Motivá pa enkurashá otro
Tokante Marhainska Sakoetoe
Mi a nasé na aña 1989 na Zeist, Hulanda. Mi mama tabata relativamente yòn i ku mi 4 aña nos a muda pa Kòrsou di unda mi mama ta bini. Dia mi tabatin 6 aña mi ruman muhé chikitu a nasé. E promé añanan di mi bida nos a bula bai bin hopi entre Hulanda i Kòrsou i ku mi 9 aña nos a keda biba Kòrsou definitivamente. Dia mi tabata chikitu mi tabata gusta lesa, te asta ora koriente bai mi tabata lesa ku lus di bela. Mi tabata trankil, gusta landa, toka kuarta na skol i mi tabata bai mi klùp di padvinderij fielmente.
Mi a bai Peter Suyvesant College (PSC), awor konosí komo Kolegio Alejandro Paula. Mi memorianan di mas dushi di e temporada ei ta enserá e tempu ku mi tabata pasa ku mi amigunan einan. Den e temporada ei mi a konosé mi kasá. Na final di nos delaster aña na PSC nos a kue rumbo pa Hulanda pa bai studia. Primeramente mi mente a pasa riba merka, pero e temporada ei ta pa Hulanda so bo por a haña finansiamentu pa estudio.
Semper mi tabata bisa na chikitu ku mi kièr a bira dòkter. Mirando bèk mi ta realisá ku mi promé inspirashon pa esaki tabata un zuster ku mi a mira tur na ünifòrm blanku. Mi tambe tabata ke bisti asina. Ora mi tabatin mas o ménos 14 aña mi a haña e oportunidat pa bai wak un dia kon e kosnan ta bai den poli. Laga nos bisa ku esei tabata e delaster dia ku m’a drenta poli.
Pues ora ku tabata asina leu p’ami bai studia mi no tabata sa kiko pa studia. Un kos mi tabata sa ta ku mi tabata kièr a hasi algu ku tin di aber ku mucha. Finalmente, mi a skohe pa bai studia Pedagogia na universidat di Utrecht. Na 2012 mi a kaba mi bachelor i mi a skohe pa hasi e master di ortopedagogia. Despues di mi estudio mi a bai traha den kuido hubenil kaminda mi ta trahando ketubai.
Den mi tempu liber mi ta gusta organisá, m’a yega di organisá sigur mas ku 50 evento; tantu pa grupo grandi (500) komo pa grupo chikitu (15). Mi ta plania tur evento ku luho i detaye i mi ta gusta traha lista, lista i mas lista di tur loke mi mester hasi. Tambe mi ta gusta lesa, pasa tempu ku amistatnan i biaha. Si mi no ta biahando, mi ta planiando un biahe. Mi ta gusta eksplorá, i tur kaminda ku mi no a yega di bai ainda ta un bon idea pa bishitá.
E buki ‘Hulanda? Sto’i nèk!’ ta e promé buki ku mi a skirbi. Aunke mi no a yega di skirbi un buki nunka promé mi a mira e reto aki komo un proyekto mas ku mi mester por realisá. Pues despues di un planifikashon i yen lista di akshon: ‘Hulanda? Sto’i nèk!’ a bira realidat.
Si tin mas buki na kaminda? Lo mi no keda strañá si mi skirbi mas den futuro. Mi a eksperensiá e aventura di skirbi mi promé buki komo algu hopi positivo. Mi ta spera e por ta di benefisio pa hopi hóben.
Komo hende nos por hasi hopi mas ku nos ta kere na promé instante. Si bo pensé, purb’é! No laga bo pesamentunan òf otro hende limitá bo.
Marhainska W. Sakoetoe